عنواني الجديد: شارع الشهداء متفرع من ميدان الحريه.
(هذا هو المكان الذي فقئت فيه الشرطه اعين مصر)
(دول راحوا ضحيه للشرطه المفتريه)
(شايفين المنظر كان عامل ازاي..لا حول ولا قوه الا بالله العلي العظيم) (الله يرحمه مات وهو لسه شايل العلم)
بعد ما عرضت عليكم جزء من الحقيقه اسمحولي ادخل في الموضوع بتاع النهارده... (الثوره لها شعب يحميها)
واضح ان السيد الرئيس محمد مرسي لسه مش قادر يستوعب ان الاخوان مش هما اللي قاموا بثورة يناير وان الشباب هما اللي صنعوها بعد طول كفاح وتعب وتعذيب من اجهزة الدوله وعلى رأسها جهاز الشرطه .. وواضح كمان انه مش ناوي يعديها على خير المرادي وآل ايه رافض إلغاء الاعلان الدستوري اللي اقره عشان ينفرض بقراراته ويبعد الشعب عن اي حق ليه في رفض اي شيئ سيادته يقرره والمصيبه الاكبر انه كمان عين نفسه "صاحب العزبه" وبقى من حقه التصرف في املاك الدوله كيفما يشاء او بمعنى ادق كيفما شاء بديع المرشد العام للإخوان المسلمين (اليد المحركه لمرسي واعوانه) يعني من حقه يكتب عقد بيع الهرم لأي حد ومش من حق حد من الشعب يعترض..!! طب هي مصر عزبه يا ريس..؟ ولا انتا نسيت اللي حصل لمبارك لما فكر يورث مصر لإبنه جمال ..؟على فكره الاتنين في السجن لو كنت نسيت..
وياريتها جت على أد كده وبس .. لا دا عمل اللي محدش فكر حتى انه يسرح بخياله فيه على مدى تاريخ مصر منذ بداية حضارتها وهو تقليص دور القضاء المصري والشك في نزاهته (الحاجه الوحيده اللي المصريين بيثقوا فيها معندهمش استعداد لأي حاجه تانيه عشان القضاء بعيد تماما عن اي سلطه ومستقل بذاته وقراراته كلها نابعه من التشريع وكلها بتصب لصالح الشعب المصري بأكمله وهو صوت العدل والحق والحريه في كل شبر في مصر) وكمان عاوز يتحكم في قراراته ومين ينفع يبقى قاضي ومين لأ (وطبعا من وجهة نظره الاخوان بس هما اللي ينفعوا وأي حد تاني لأ) ...
دا طبعا غير حاجات كتير جدا هنبقى نتناقش فيها بعد كده بس الاسباب دي هي الرئيسيه دلوقتي وهي اللي خلت الثوره تقوم من تاني النهارده وخلت شعب مصر كله يهتف في كل الميادين اللي في كل المحافظات في صوت واحد ووقت واحد .. (ثوره ثوره حتى النصر .. ثوره في كل شوارع مصر) وفي الحقيقه انا مروحتش التحرير من اول اليوم بس دا كان لسبب وجيه وهو اني كنت حابب اشوف المليونيات وهي بتحتشد وبتتحرك من كل اتجاه وماشيين في اتجاه واحد .. الى شارع محمد محمود متفرع من ميدان التحرير (شارع الشهداء متفرع من ميدان الحريه) وللشارع ده حكايات طويله هنتكلم فيها بعدين بس المهم دلوقتي انه من امام نادي القضاه اتحركت مسيره القضاه متجهه الى ميدان التحرير ومن دار القضاء العالي اتحركت مسيره اخرى للقضاه ومن امام نقابة المحامين اتحركت مسيرة المحامين ومن امام النقابات الفنيه اتحرك الفنانين بمختلف ميولهم الفنيه ومن امام كل حزب في مصر في كل منطقه وحي اتحركت مسيرات ومليونيات شعبيه كلها بتعلن رفضها للإعلان الدستوري او بمعنى ادق الاعلان الديكتاتوري عشان بصراحه خلاص مبقيناش ناقصين والشعب طفح كيله خلاص وفاض بيه ومش مستحمل اي حاجه وكفايه اللي حصل ونفسنا بجد نتنفس حريه وديمقراطيه ودي بعض الصور اللي نقلتهالكم من الفيس بوك عشان تعرفوا أد ايه المصريين مش بيسيبوا حقهم وإنه مهما زاد الظلم لازم يكونله آخر يوم انتصار الحق بقوة رب قادر...
(الجدع جدع والجبان جبان وانتا لو جدع انزل الميدان)
(دا ميدان التحرير قبل وصول المسيرات والمليونيات)
((دا ميدان التحرير مع بدء دخول الليل))
( الميدان دلوقتي ) بس اسمحولي اقولكم منطق الاخوان النهارده كان عامل ازاي..
:: اولا اي حد في التحرير دلوقتي يعتبر بالنسبالهم فلول وأي حد منزلش الميدان النهارده لأي سبب يبقى اخواني او على الاقل موافق على الاعلان الدستوري :: ثانيا هما في ثورة يناير كانوا بيعتبروا حرق مقرات الحزب الوطني( والله اعلم مين اللي حرق) عمل بطولي وثوري ولما حد النهارده حرق مقراتهم الحزبيه (وبرضو الله اعلم مين اللي حرق) اعتبروها غلط في حق احزاب مصر كلها !! طب الكلام ده متقالش ليه في الاول ولا هي حلوه ليهم وحشه ليكم !!!
وفي النهايه تبقى هذه المبادره دليلا على ان شعب مصر لا يريد الخساره لأحد وانه لم يقم بالثوره الا من اجل نهضة مصر
سلام بقى عشان اتابع الدنيا عامله ازاي وآجي احكيلكم باااااي
الرئيسية
أحدث الصور
مشاركات
عنواني الجديد:شارع الشهداء متفرع من ميدان الحريه.
